WADAU WA ELIMU WAKOSEA UFAULU WA DARASA LA SABA

Dar es Salaam. Wadau wa elimu nchini wamekosoa ufaulu wa matokeo ya darasa la saba yaliyotangazwa juzi kwa kusema siyo ishara ya kukua kwa sekta hiyo, ilhali kuna tatizo la kisera.

Kauli hizo zimejitokeza baada ya Baraza la Mitihani Tanzania (Necta), kutangaza ufaulu wa wanafunzi 451,392 kati ya 808,085 waliosajiliwa kufanya mtihani.

Katika ufaulu huo, somo la Kiswahili linaongoza kwa asilimia 69.70, huku  Kiingereza kikiwa ni asilimia 38.84, ikilinganishwa na asilimia 35.52 za mwaka jana.

Katibu mtendaji wa Jumuiya ya Wamiliki wa Shule na Vyuo Binafsi nchini (TAMONGSCO), Benjamin Nkonya alisema matokeo hayo ni maandalizi ya wanafunzi kuanguka kimasomo katika ngazi ya sekondari kwa kuwa watafundishwa kwa Kiingereza, lugha  ambayo wengi hawaijui.

“Somo walilofeli ni Kiingereza, ambalo ndiyo msingi wa kufaulu kwa ngazi ya sekondari. Mpango wa Matokeo Makubwa Sasa (BRN) unaweza kuwa mbwembwe tu, kwani tatizo hilo limekuwa la kisera,” alisema na kuongeza:

“Hata mipango ya awali ya Upe (Elimu ya Msingi kwa Wote) na MMEM (Mpango wa Maendeleo ya Elimu ya Msingi) haikuonyesha mafanikio yoyote, matokeo yake wanafunzi wanaotoka daraja hilo wanaishia kupata alama ‘0’ kwa kudhani ni wajinga kumbe hawakuwa na uelewa wa lugha ya kufundishia.”

Profesa George Shumbusho wa Chuo Kikuu cha Mzumbe alisema pamoja na udhaifu wa matumizi ya lugha, kiwango hicho cha ufaulu siyo ishara ya mafanikio.

Profesa Shumbusho alihoji inakuwaje wanaofaulu baadhi yao huwa hawafikii vigezo vya kuingia ngazi ya elimu ya sekondari.

“Wamefaulu nusu, lakini utakuta wengi wanaingia kidato cha kwanza hawajui kusoma na kuandika, hawana uwezo na ufahamu wa kutosha katika masomo? bado inatia shaka sana na wingi huo wa ufaulu,” alisema.

“Mbali na hilo, hata wale wanaoshindwa kuendelea na kidato cha kwanza wamejengewa uwezo gani katika masomo ya stadi za kazi ili kujitegemea kwa kazi za kujiajiri?”

Mhadhiri mwandamizi wa Idara ya Saikolojia na Mtalaa ya Chuo Kikuu cha Dar es Salaam (UDSM), Eugenia Kafanambo alisema siyo sahihi kuhukumu matokeo hayo kwa sasa, kabla ya kuona uwezo wa wanafunzi hapo baadaye.

Eugenia alisema mpango wa BRN unaweza kuwa sababu ya ufaulu huo kutokana na walimu kujizatiti katika utekelezaji wake.